កែវ សុខ​សិលា សម្តែង​អារម្មណ៍​សោកស្តាយ​ចំពោះ​ការ​របូត​គ្រាប់​បាល់​ដ៏​ច្រើន​ជាមួយ​អ៊ីរ៉ង់

288

ការប្រកួត​វគ្គ​ជម្រុះ FIFA World Cup 2022 បាន​ដំណើរ​ការបញ្ចប់​ការប្រកួត​ទី​៣ ហើយ​កាលពី​រាត្រី​ថ្ងៃទី ១១ ខែ តុលា ឆ្នាំ​២០១៩ ដោយ​ក្នុង​ពូ​ល C អ៊ីរ៉ង់ បាន​បំបាក់ កម្ពុជា ១៤ ទល់នឹង ០ ហើយ​នេះ​គឺជា​ប្រវត្តិសាស្ត្រ​ដែល​កម្ពុជា បរាជ័យ​ធ្ងន់​បែបនេះ​។

អ្នកចាំទី​វ័យ ២២​ឆ្នាំ កែវ សុខ​សិលា របស់​ក្លិប​វិសាខា ក្នុងការ​បង្ហាញខ្លួន​ការពារ​តំបន់​គ្រោះថ្នាក់​របស់​កម្ពុជា បាន​និយាយ​ក្រោយ​មិនអាច​រារាំង​ពី​ការ​ទាត់​ទម្លុះ​សំណាញ់​ទី​របស់​កីឡាករ​អ៊ីរ៉ង់​ថា “ ខ្ញុំ​គិត​ថា ពួក​យើង​មិនមាន​អ្វីមួយ​ដែលមាន​ប្រៀប​លើ​គេ​នោះទេ ទាំង​កាយសម្បទា អាកាសធាតុ និង​កំរិត​របស់​ក្រុម គឺ​ពួកគេ​លើ​យើង​ទាំងអស់ ដូចនេះហើយ​វា​អាចធ្វើ​ឲ្យ​យើង​មាន​សម្ពាធ​ក្នុងការ​ប្រឈម​នឹង​ពួកគេ ” ។

សិលា បាន​បង្ហោះ​លើ​គណនី​ហ្វេ​ស​ប៊ុ​ក​របស់​ខ្លួន​ថា “ វា​ជា​លើកទីមួយ​ហើយ​សម្រាប់​ខ្ញុំ តែ​ខ្ញុំ​សប្បាយ​ចិត្តនឹង​ទទួលយក​វា​ព្រោះ​វា​អាច​បង្ហាញ​ឲ្យ​ខ្ញុំ​ឃើញ​ថា ខ្ញុំ​បាន​រីកចម្រើន​ដល់​កំរិត​ណា​ពេលដែល​បាន​លេង​ជាមួយ​ក្រុម​មួយ​ដែល​គេ​មាន​កំរិត​មួយ​ដែល​ខ្ពស់ ហើយ​លទ្ធផល​មួយ​នេះ​ខ្ញុំ​នឹង​យកមក​ពង្រឹង​ខ្លួនឯង​បន្ថែម​ទៀត អរគុណ​ដល់​បងប្អូន​ទាំងអស់គ្នា​សម្រាប់​ការលើកទឹកចិត្ត ”។

៤​គ្រាប់​របស់​អ៊ីរ៉ង់ ទាត់​បញ្ចូល​ទី​កម្ពុជា គឺ​កើតឡើង​នៅ​នាទី ៥, ១១, ១៨, ២២, ៣៦, ៤០, ៤៤, ៤៩, ៥៤, ៦១, ៦៥, ៦៧, ៨៥ និង ៨៨ ដែល​សម្រេចបាន​ដោយ​កីឡាករ​ដូចជា Ansarifard ៤​គ្រាប់​ម្នាក់ឯង​, Azmoun ៣​គ្រាប់​ម្នាក់ឯង​, Taremi ២​គ្រាប់​ម្នាក់ឯង​, Mohebi ២​គ្រាប់​ម្នាក់ឯង Nourollahi ១​គ្រាប់​, Kanaani ១​គ្រាប់ និង Mohammadi ១​គ្រាប់​។ ក្នុងនោះ​ផងដែរ អ្នកចាំទី​ដៃ​ទីមួយ​របស់​អ៊ីរ៉ង់ Beiranvand បាន​សង្គ្រោះ​បាល់​ពិន័យ​១១​ម៉ែត្រ ១​គ្រាប់​ផងដែរ ពី​ការទា​ត់របស់​កីឡាករ​កម្ពុជា កែវ សុខ​ផេង​។

​គួរ​ឲ្យ​ដឹង​ថា ប្រកួត​បន្ទាប់​ទៀត​ក្នុង​ពូ​ល C គឺ កម្ពុជា ទទួល អ៊ីរ៉ាក់ នៅ​ថ្ងៃទី ១៥ ខែ តុលា ឆ្នាំ ២០១៩ វេលា​ម៉ោង ៦:៣០​នាទី​ល្ងាច នៅ​ពហុ​កីឡដ្ឋាន​ជាតិ និង បា​រ៉ែ​ន ទទួល​ស្វាគមន៍ អ៊ីរ៉ង់ វេលា​ម៉ោង ៧និង៣០​នាទី​យប់ នៅ​កីឡដ្ឋាន​ជាតិ​របស់​បា​រ៉ែ​ន៕
ម៉េង ហួរ