អបអរ! ព្រះខ័ន​រាជ​ស្វាយរៀង​បាន​លេង AFC Cup ក្រោយ​ទទួល​បាន​អាជ្ញាប័ណ្ណ AFC ជាមួយ​ក្លឹប ២​ទៀត​

1225

ទីបំផុត​ក្លឹប​ព្រះខ័ន​រាជ​ស្វាយរៀង បាន​ទទួល​សិទ្ធ​ចូលរួម​ប្រកួត​ពាន​កម្រិត​ទី​២ ប្រចាំ​ទ្វីប​អាស៊ី AFC Cup 2020 ជា​ផ្លូវការ​ហើយ បន្ទាប់ពី​ក្លឹប​ជើង​លី​គ​កំពូល​កម្ពុជាឆ្នាំ​២០១៩ បាន​ទទួល​អាជ្ញា​ប័ណ្ណ AFC Club Licensing ពី​សហព័ន្ធ​កីឡាបាល់ទាត់​អាស៊ី​សម្រាប់​ឆ្នាំ​២០២០ ជាមួយ​ក្លឹប ២​ទៀត​គឺ​ក្លឹប​បឹងកេត និង​ក្រុម​អង្គ​រថា​យ​ហ្គឺ​រ​កាល​ពី​ពេល​ថ្មីៗ។

Image may contain: 11 people, people smiling, people standing

​នេះ​គឺជា​ដំណឹង​ល្អ​មួយសម្រាប់​អ្នកគាំទ្រ ​ក្រុមព្រះ​ខ័ន​រាជ​ស្វាយរៀងដែល​ទន្ទឹង​ចង់​ដឹង ក្រោយ​ក្រុម​មាន​មូល​ដ្ឋាន​នៅ​ខេត្ត​ស្វាយរៀង​នេះ ដណ្ដើម​បាន​ជើងឯក​លី​គ​កំពូល​កម្ពុជាកាល​ពី​ពេល​ថ្មីៗ ហើយ​ចង់​ឃើញ​ក្រុម​ដឹកនាំ​ដោយ​លោក Conor Nestor នេះ បន្ដ​ចូលរួម​ប្រកួត​ពានរង្វាន់​កម្រិត​ទី​២ ប្រចាំ​ទ្វីប​អាស៊ី ក្រោយ​ព្រះខ័ន​រាជ​ស្វាយរៀងខកខាន​ឱកាស​លើក​ពាន​ជាច្រើន​ឆ្នាំ​កន្លងទៅ។​

Image may contain: 4 people

ចំពោះ​ការ​ប្រកួត​ពានរង្វាន់ AFC Cup 2020 ក្លឹប​បាល់ទាត់​តំណាង​ប្រទេស​កម្ពុជា ត្រូវ​ឆ្លងកាត់​ការប្រកួត​ជម្រុះ​បឋម​សិន ដោយ​គ្រោង​រៀបចំ​ពិធី​ចាប់ឆ្នោតនា​ថ្ងៃ​ទី​១០ ខែ​ធ្នូ​ខាងមុខ គ្រា​ដែល​ការប្រកួត​វគ្គ​ជម្រុះ​បឋម គឺ​គ្រោង​នឹង​ចាប់ផ្ដើម​ការប្រកួត​នៅ​ដើមខែ​កុម្ភៈ ឆ្នាំ​២០២០។

Image may contain: 13 people, people smiling, text

​គួរ​ដឹង​ថា អាជ្ញាប័ណ្ណ​ក្លឹបដែល​ទទួលស្គាល់​ ដោយ​សហព័ន្ធ​កីឡាបាល់ទាត់​ទ្វីប​អាស៊ី ក្លឹប​នីមួយៗត្រូវ​បំពេញ​លក្ខណៈ​ពិសេសៗ​មួយ​ចំនួន ដូចជា​គ្រូ​បង្វឹក​ក្រុម​ធំ​ត្រូវ​មាន​សញ្ញាប័ត្រ A License ហើយ​មាន​យុវជន​យ៉ាងតិច ២​ក្រុម ហើយ​ចូលរួម​ក្នុង​លី​គ​យុវជនជាមួយ​នឹង​គ្រូ​សញ្ញាប័ត្រ C License មាន​ក្រុម​គ្រូពេទ្យ​ប្រចាំ​ក្លឹប មាន​កិច្ចសន្យា​ត្រឹមត្រូវ​រវាង​ក្លឹប​ជាមួយ​កីឡាករ មាន​កម្មវិធី​អភិវឌ្ឍន៍​យុវជន មាន​កីឡដ្ឋាន​ស្តង់ដារ ទីលាន​ហ្វឹកហាត់ រដ្ឋបាល​ក្លឹប រចនាសម្ព័ន្ធ​ក្លឹប និង​ខ្ទង់​ចំណូល​-​ចំណាយ​ប្រចាំខែ និង​ប្រចាំ​ឆ្នាំ​ជាដើម៕