ចិន ស្នើសុំឲ្យ​ថៃធ្វើជាម្ចាស់ផ្ទះរៀបចំការប្រកួតជម្រុះ World Cup ២០២២ របស់ខ្លួន

575

សហព័ន្ធបាល់ទាត់ជាតិ​ចិន CFA មានគម្រោង​ស្នើសុំ​ប្រទេសថៃឲ្យ​ធ្វើជាម្ចាស់ផ្ទះ រៀបចំការប្រកួត​ជម្រុះ World Cup ឆ្នាំ ២០២០ របស់​ខ្លួន ខណៈដែលប្រទេសចិនកំពុងញុំាញីដោយ​វីរុស​កូរ៉ូណា Covid-19។

ជម្រើសជាតិ​ចិន និងត្រូវ​តទល់ជាមួយម៉ាឌីវ នៅថ្ងៃទី ២៦ខែមីនា និង​ជាមួយ Guam នៅថ្ងៃទី ៣១ខែមីនាខាងមុខ។ ការពិតទៅ ចិន ត្រូវ​ធ្វើជាម្ចាស់ផ្ទះស្វាគមន៍​តែក្រុម​ម៉ាឌីវមួយប៉ុណ្ណោះ ប៉ុន្តែម៉ាឌីវស្ទាក់ស្ទើរក្នុងការឆ្លងទៅកាន់ចិន ទើបចិនក៏សម្រេច​សុំថៃឲ្យ​ទទួលធ្វើជាម្ចាស់ផ្ទះ។

ចំណែក Guam វិញជាប្រទេសស្ថិតនៅដែនកោះអាមេរិក តែ​ដោយសារសហរដ្ឋអាមេរិកបាន​ផ្អាក​មិន​ឲ្យ​ជនជាតិ​ចិន ឆ្លងចូលទឹកដី​ពួកគេមួយ​រយៈ ដោយសារតែភ័យ​ខ្លាចពីការឆ្លងរាលដាលនៃវីរុសកូរ៉ូណា ដូច្នេះទើប​ចិនសម្រេច​អញ្ជើញ​ Guam ឲ្យ​ទៅប្រកួត​ក្នុងប្រទេសថៃតែម្តង។

យោងតាមសារព័ត៌មាន​ចិនបានរាយការណ៍ថា ប្រទេសថៃ បាន​យល់​ព្រម​លើសំណើរ​របស់​ចិននេះហើយ គេក៏គ្រោង​នឹង​អនុញ្ញាតឲ្យ​យក​កីឡដ្ឋាន Chang Arena របស់ក្លឹប Buriram United ដើម្បីរៀបចំការប្រកួត។ ប៉ុន្តែ​ការប្រកួត​នោះ នឹង​ត្រូវធ្វើឡើង​ជាលក្ខណៈបិទទ្វារ​ មិន​ស្វាគមន៍អ្នក​គាំទ្រ​នោះទេ ដោយបារម្ភពីហនិភ័យនៃការឆ្លងមេរោគកូរ៉ូណា។

យ៉ាងណាមិញ សហព័ន្ធបាល់ទាត់ពិភពលោក FIFA និង​សហព័ន្ធបាល់ទាត់អាស៊ី AFC នៅមិនទាន់​សម្រេចជាផ្លូវការចំពោះគម្រោងនេះនៅឡើយទេ៕