Buriram United ត្រៀមនាំចូលកីឡាករធ្លាប់លេងនៅ Premier League មួយ​រូប

362

ក្លិបយក្សថៃ Buriram United បានបញ្ចប់រដូវកាលដោយមិនបានឈ្នះពានអ្វីសោះជាលើកដំបូងក្នុងរយៈពេល ៩ ឆ្នាំ។ ដោយថ្មីៗនេះបានរបូតពាន Thai League 1 ទៅក្រុមគូរប្រជែង Chiangrai United រដូវកាល ២០១៩ នេះ។

សម្រាប់​ពាន Thai League Cup 2019 ក្រុម Buriram United បានធ្លាក់ក្រោមស្នាដៃ PT Prachuap FC នៅក្នុងវគ្គផ្តាច់ព្រ័ត្រកាលពីខែកញ្ញា ខណៈ FA Cup ធ្លាក់​ត្រឹមវគ្គពាក់កណ្តាលផ្តាច់ព្រ័ត្រ ដោយបានចាញ់ក្រុម Ratchaburi Mitr Phol FC។

ដោយឡែក ​ចំពោះ​ស្ថានភាព​ក្រុមបច្ចុប្បន្នគេសង្កេតឃើញថាហាក់មិនមានភាពប្រសើរឡើយ ចាប់តាំងពីការចាកចេញរបស់ខ្សែប្រយុទ្ធប្រេស៊ីល Diogo Luis Santo ទៅចូលរួមជាមួយ​ក្រុម Johor Darul Ta’zim (JDT) របស់ម៉ាឡេស៊ីកាលពីឆ្នាំមុន។

បើយោងតាមប្រភព SMMSport បានរាយការណ៍​ថា Buriram United  បានមានបំណងនាំយកអតីតខ្សែប្រយុទ្ធធ្លាប់លេងនៅក្របខ័ណ្ឌ Premier League កីឡាករ​ Adam le Fondre មកចូលរួមនៅរដូវកាលក្រោយ។

Le Fondre បច្ចុប្បន្ន​មានវ័យ ៣២ឆ្នាំ កំពុងលេងឲ្យក្រុម Sydney FC ក្នុងលីគកំពូលអូស្រ្តាលី (A League)។ រូបគេធ្លាប់បង្ហាញខ្លួននៅក្នុងក្របខ័ណ្ឌ Premier League ជាមួយ​ក្លិប Reading ក្នុងរដូវកាល ២០១២-១៣ ដោយស៊ុតបញ្ចូលទីបាន ១២ គ្រាប់ក្នុងការបង្ហាញខ្លួន ៣៤ លើកសម្រាប់ក្រុម។

ខ្សែប្រយុទ្ធ​សញ្ជាតិ​អង់គ្លេស​រូបនេះ ក៏មានបទពិសោធន៍លេងឲ្យក្លិបមួយចំនួនដូចជា Bolton Wanderers, Wolverhampton Wanderers និង Cardiff City ក្នុងក្របខ័ណ្ឌ​ Championship។

ប្រភព៖ Fox Sport Asia