Juventus ឡើងឈរកំពូលតារាង ក្រោយឈ្នះ Brescia ទាំងគ្មាន Ronaldo

305

​ក្រុម​ការពារ​តំណែង​ជើងឯក​សេះបង្កង់ Juventus​ បាន​រំកិល​ឡើង​កាន់​កាប់​កំពូល​តារាង​ក្រប​ខណ្ឌ​អ៊ីតាលី Serie A បណ្ដោះអាសន្ន​​ក្រោយ​ឈ្នះ​នៅ​ទឹកដី Brescia ២-១ យប់មិញ

Alfredo Donnarumma​ បាន​បើក​ការនាំ​មុខ​អោយ​ក្រុម​ម្ចាស់ផ្ទះ​តាំងពី​នាទី​ទី៤ ស្រប​ពេលដែល Mario Balotelli ​អតីត​ខ្សែប្រយុទ្ធ Liverpool និង Manchester City បាន​ចូល​លេង​អោយ Brescia លើកដំបូង​តាំងពី​ផ្ទេរ​ពី​ទឹកដី​បារាំង​។

​មុន​ចប់​វគ្គ​ទី១ ម្ចាស់ផ្ទះ Brescia ក៏​ភ្លាត់​ធ្វើអោយ​បាល់​ចូល​ទី​ខ្លួន​ឯ​ងដោយ​ខ្សែការពារ​វេ​ណេ​ហ្សុ​យ​អេ​ឡា Jhon Chancellor មុន​ពេលដែល​ខ្សែបម្រើ​បូ​ស្នៀ Miralem Pjanic ​ស៊ុត​គ្រាប់​ជ័យជំនះ​អោយ Juventus​ នៅ​នាទី​ទី៦៣’​។

​​ការប្រកួត​នេះ​មិន​មាន​វត្តមាន​ខ្សែប្រយុទ្ធ​ព័រទុយហ្កាល់ Cristiano Ronaldo ឡើយ​ដោយមាន​បញ្ហា​សាច់​ដុំ​។ ​បី​ពិន្ទុ​នេះ​បានធ្វើអោយ Juventus​ ឡើងឈរ​កំពូល​តារាង​បណ្ដោះអាសន្ន​ក្នុង​សប្តាហ៍​ទី​៥ ពី​លើ​ក្រុម​លេខ​២ Inter Milan ១​ពិន្ទុ តែ Inter Milan នឹង​ត្រូវ​ប្រកួត​យប់​នេះ​ជួប​ជាមួយ Lazio