Son នឹងត្រូវដាក់ឲ្យ​នៅដាច់ដោយឡែក ពេលត្រលប់មកពី​កូរ៉េខាងត្បូងវិញ

204

Son Heung-min ប្រធានក្រុម​ជម្រើសជាតិ​កូរ៉េខាងត្បូង និង​ជា​ខ្សែប្រយុទ្ធរបស់ក្លឹប Tottenham Hotspur ត្រូវតែចំណាយ​ពេល​នៅឲ្យ​ដាច់ដោយឡែក​ពីគេ រយៈពេល ២ សប្តាហ៍ ពេល​​ត្រលប់​មកពីប្រទេស​កូរ៉េខាងត្បូងវិញនៅចុងសប្តាហ៍នេះ។

ការរឹតបណ្តឹងនេះ គឺដើម្បីការពារការឆ្លងរាលដាលនៃមេរោគកូរ៉ូណាថ្មី ឬ Covid-19 ខណៈប្រទេសខាងត្បូង ក៏កំពុងតែផ្ទុះការឆ្លងរាតត្បាតនៃមេរោគនេះយ៉ាងខ្លាំងក្លាដែរ។

យោង​តាម​សារព័ត៌មានអង់គ្លេស ក្លឹប​ Tottenham Hotspur មានជំនឿយ៉ាងមុតមាំថា Son នឹងមិនមានឆ្លងមេរោគកូរ៉ូណានោះទេ។ ប៉ុន្តែខាងក្លឹបរីករាយ​នឹងសហការជាមួយអ្នក​ជំនាញ ដើម្បីតាមដាន​ពីស្ថានភាពរបស់កីឡាករកូរ៉េខាងត្បូងម្នាក់នេះ។ Son ត្រូវរំពឹងទុក​ថា នឹងត្រូវដាក់ឲ្យ​នៅដាច់ដោយឡែក ក្នុងផ្ទះរបស់គេ​ដោយ​មានការ​ឃ្លាំមើល​ពីអ្នក​ជំនាញផ្នែក​សុខាភិបាល​ដែរ។

គួរជម្រាបជូនថា Heung-min Son នឹងត្រូវអវត្តមានពីការប្រកួតរហូតដល់ចប់រដូវកាល ដោយ​សារបញ្ហា​របួស​ដៃធ្ងន់ធ្ងរ ដែល​ដូចទៅនឹងរបួស​ចាស់​ដ៏ធ្ងន់ធ្ងរ កាលពីឆ្នាំ ២០១៧។ ប្រការនេះហើយ ទើប​ក្លឹប​បាន​ព្រមព្រៀងឲ្យ Son ទៅធ្វើការ​វះកាត់ និងសម្រាកព្យាបាលក្នុង​ផ្ទះ នៅប្រទេសកូរ៉េខាងត្បូងរបស់គេ។

ក្រោយ​វះកាត់រួច Son ត្រូវរំពឹងថាត្រលប់មក​កាន់ប្រទេសអង់គ្លេសវិញ ដើម្បី​តាមដាន​ពីស្ថានភាពរាងកាយ និងប្រើប្រាស់​ឧបករណ៍ជំនួយ​ខ្លះៗ ដើម្បីធ្វើយ៉ាងណាឲ្យ​គេ​អាចចូលរួមហ្វឹកហាត់វិញបាន។ ខាងក្លឹប Spurs មានសុទិដ្ឋិនិយមថា ប្រសិនបើ​មានឧបករណ៍ជំនួយ​ល្អនោះ Son អាចនឹងត្រូវបាន​ចូលលេងវិញមុនពេលចប់រដូវកាលបាន៕

អត្ថបទ​៖ FoxSport